يالا نلبس شباشب (جزم ) بعض.
قبل ماحد يشتم ويلبخ..دي مش دعوه لسرقه الشباشب من علي باب الجامع ولا الكنيسه. .
التانيه البس الشبشب اللي يعجبك وابليهم بشبشبك القديم...
لا ده مثل سمعته من واحد أمريكي. ..بمعني حط نفسك مكان غيرك...
ودي احسن طريقه تقدر بيها تتحكم في انفعالاتك وتقدر بيها تحكم علي تصرفات الناس وتقدر ييها تسامح غيرك، لانك لما تحط نفسك مكانه تقول ده انا كنت هااعمل اكتر من كده.
امثله:
لو انت مدير او صاحب عمل ،،ومطلوب منك تحدد مرتبات وساعات العمل للموظفين..
ماتقعدش في مكتبك المكيف وانت عندك سواقك وتحط السياسات دي،لازم تعيش شويه في دور الموظف اللي بيجي لك متمرمط في المواصلات وتحاول تحس لو انت مكانه عاوز تعيش ازاي وممكن تاكل ايه ويكفيك كام..فتقدر تحس بيه وتحط سياسات تخللي الناس تشتغل وهي راضيه وتدعي لك بدل ماتدعي عليك.
لما تحصل لك مشكله او يكون عندك حالة وفاه او حد عيان...وناس اصحابك ماجوش العزا او ماجوش يسالوا عليك وانت عيان...
اعذر ، ماانت ياما مالحقتش تحضر جنازات وياما ناس عيت وانت ماسالتش وكنت بتلاقي لنفسك عذر .. عديها وماتزعلش وقول اكيد غصب عنهم
بدل ماتقعد تهري وتنكت في روحك وتقول اصلهم ماعبرونيش وتعملها زعله.
لما تكون جوز ، راجع من شغلك تعبان وداخل البيت فاكر انك هاتلاقي ايليسا مستنياك بفستان سواريه وبتغنيلك وحشتني...وإذ تفاجأ بعم الاشكيف بالقمطه وريحه البصل بتفتحلك الباب وبترقع بالصوت الحياني حووووش النسانيس اللي مخلفهم دول لااقتلهم....
ماتتلويش وتخرج وترزع الباب وتروح تشكيها لامك. أدخل حوش عنها عصابه حمادة وتوتو اللي مخلفهم وطبطب عليها ..وتخيل نفسك مكانها راجعه من الشغل عدت خدت القرود من المدرسه ورجعت جري دخلت عالمطبخ تحضر الغدا وهي بتروض الوحوش في نفس ذات الوقت وبتنبه عالعيال (غيروا هدومكم، علقوا الهدوم ،اغسلوا ايديكم، حضروا كتبكم ،..الخ) وطبعا العيال بيتشقلبوا وبيضربوا بعض وبيصرخوا وبيشتكوا ولاحد معبرها أصلا. .شوف انت لو مكانها هاتعمل إيه. ..البس شبشبها ولا جزمتها ام كعب رفيع 11سم

لو حضرتك جوزه ؟ واايف يعني ، وجوزك يوم عيد ميلادك راجع تعبان من الشغل ومش قادر يخرجك..
هع هع هع في دي بقي مش هااقدر اتكلم. ...طبعاً تنكدي عليه حبيبتي دي مش محتاجه فكاكه...
بس بلاش تقتليه..
ممكن تحتفلي في البيت عاديشششي خالص ،وتقدري انك جايز برضه يوم عيد ميلاده تجي لك حصبه تاخد أجلك.
عادي بتحصل..فأكييد هو مش قاصد يغلس عليكي
خليكي بنت ناس وعديها ..والنكد مش هايخلص يعني.
حط نفسك مكان الكناس في الشارع والبياع الغلبان والشغاله والبواب وشوف كنت تحب الناس تعاملك ازاي؟؟
حطي نفسك مكان حماتك وشوفي تحبي مرات ابنك تعمل ايه معاكي، والعكس
حط نفسك مكان العريس اللي متقدم لبنتك وشوف لو مكانه تحب حماك يطلب منك ايه.
البسوا شباشب وجزم بعض فتقدروا تحكموا وتتصرفوا صح..