كتبت في بوست قبل كده اننا في مصر مش عارفين واجباتنا ولا عاوزين حقوقنا.. ده في الحاله السياسيه أو في تعاملنا مع الحكومه.
إنما في تعاملنا مع بعض بقي كأقارب أو أصحاب أو زمايل أو جيران..
تلاقينا بنستهبل في واجباتنا، وعاوزين ناكل حقوق غيرنا.
اغلبنا أتعلم إنه ياخد.. ياخد حقه وحق غيره،، حق اخواته، وجيرانه، وزمايله.. أي حق مش حقه عاوز يلهفه،،
لا والاكاده بيعتبروه إنه حق مكتسب.
وهنا مش بس بتكلم عن الحقوق الماديه فقط.
فهتلاقي مش بس الجار عاوز يلابط في دفع فلوس الصيانه وأجرة البواب وخلافه، لا ده عاوز ياخد مكانه ومكان جاره إللي مسافر في الجراج مثلا،، أو سايب قدام شقته زباله وريحه نتنه، أو مشغل تلفزيون بصوت عالي وعامل إزعاج للناس كلها، وإللي بينفض سجاده عالسلالم وإللي سايب غسيله ينقط،أو إللي سباكته بايظه وألميه بتوقع سقف جاره وهو ولا هامه.. وغيره وغيره.
والصاحب إللي غير إنه هاري صاحبه سلف بدون رد.. كمان ممكن يبرشط عليه في بيته في أي وقت،، زيارات بدون مواعيد.. شكوى عمال علي بطال.. وهو مش حاسس بمشاكل صاحبه أصلا.. وإن حب الصاحب ده يوقفه عند حده.. يملأ الدنيا صراخ وعويل إن الصداقه بقت عملة نادرة والأصدقاء بقوا عديمى الاصل.
نيجي للاصعب بقي.. العيله والاسره.. بعض اشباه البشر بيتخيلوا إن الاب والام سواء معاهم فلوس أو معاهمش ملزمين بالاتفاق على ولادهم حتى لما يبقوا بغال كده وبيشتغلوا و متجوزين وليهم بيوت..
أنا أعرف وآحده بتشتغل وربنا فاتحها عليها وواخده كارت المعاش بتاع أمها الوحدانيه بتصرف منه على نفسها بعد ما خدت أصلا كل أللى حيلتها. الاخ أو الاخت إللي عاوز ياخد ميراث أخواته بحجة إنهم ربنا فاتحها عليهم ومش محتاجين.
والاخوات إللي قاعدين باصين لرزق آخواتهم إللي سواء ربنا فتحها عليهم وعايشين هنا، أو سافروا واتغربوا وطفحوا الكوته، غربه ومجهود ومرمطه.
ده فيه ناس حرفيا قاعدين يعدوا علي إللي ربنا رزقه، كام مره بيخرج ياكل بره، وكام مره سافر يتفسح،، وتمن هدوم عياله وسعر عربيته،، وطبعا عاوزينه يشاركهم رزقه، ولما يشتكوا لحد طبعا يشجعهم ويقولهم إنه لازم يساعدهم. ودول أصلا بتوع لو اديتهم صباعك ياكلوا دراعك، يعني مهما أديت وساعدت ،، لا ماينفعش هما عاوزينك تديهم دخلك كله وهما يتصرفوا براحتهم
في حين إن الناس دي لو وفروا نص مجهودهم في مراقبة الناس ده واشتغلوا علي نفسهم،،هايبقوا كويسن ومايحتاجوش حاجه من حد.
اعزائي المتنطعين
جارك له حق في الراحه في بيته زيك تمام فخلي عندك دم وبلاش نطاعه،،أكل حق الغير ده تصرف حيواني.
الأصدقاء لهم حقوق زيكم بالظبط حيث إنهم بشر برضه، احترموا حدود بعض تزيد المحبه.
اعزائي المتنطعين الطماعين..
أخوك واختك إللي سافروا يشتغلوا أو هاجروا. مش بيصحوا يلاقوا الفلوس تحت المخده.. دول شايفين أيام زرقا، وإن جم اجازة يصرفوا شوية فلوس ده تعويض نفسي مش فشخره.. فارحموهم.. عاوزين تبقوا زيهم اعملوا زيهم.. مش تقعدوا تأنتخوا في بيوتكم ومطلوب منهم يصرفوا عليكم.
اعزائي الناجحين،، تكافلوا مع من يستحق فقط من أهلكم وجيرانكم عشان ساعات بعض المجاملات بتتحول لحقوق مكتسبه والبحر يحب الزياده.. وبتحولوا ناس لعاطلين وطماعين لإنهم بيكتفوا بالعيشة عالاعانات،،و بيخافوا يشتغلوا تقطعوا عنهم الشهريه..
اعزائي الآباء والامهات، ولادكم ليهم حق عليكم الربايه أولا، والمصاريف لغاية مايتخرجوا ويشتغلوا.. كفايه بقي تجوزوهم من غير أي مسؤليه منهم،، وتصرفوا علي عيالهم وتدوهم شهريات.. الابن أو الابنه إللي قاعد في البيت لأن أهله بيصرفوا عليه أنتوا المسؤلين عن تحويله لعواطلي،، كفايه دلع مريء بقي.. أنتوا السبب في تخريج أجيال ماعندهاش دم.
آسفة للاطاله بس انا قربت اتنقط من إللي بشوفه واسمعه