الأنانية لدى الرجال
فيه نوع من الرجالة منتشر أوي أوي.. يكاد يكون متفشي في الزمن ده إسمه " الراجل الأناني" ( طباعه تشبه النرجسية)
وده مش مجرد طبع وحش في العلاقات.. ده بيخرب أي علاقة وأي بيت.. ومشكلته إنه مش بيتعرف إلا بعد مدة من الإرتباط..

الراجل ده ليه علامات ودلالات بتبان في كلامه وفي حواراته وطريقته..

الأناني طول مانتي مش في ايديه هو بيتودد وبيجري وراكي. لحد ما يمتلكك وبعدها يسيبك لأنه ضمن وجودك..

الأناني دايما يطلع عندك مشكلة ما.. ويقولك انك اللي عندك مشكلة ويحسسك انه مستحملك بالعافية..

الأناني بيعملك عقد نفسية ويشكك في نفسك دايما ويخليكي تحسي احاسيس غريبة عمرك ما حستيها غير معاه وممكن تكرهي نفسك..

الأناني واحد متصالح مع نفسه وعنده ثقة كبيره انه صح.. فبالتالي لما تشوفيه بيتعامل معاكي بثقته دي بتحسي انك انتي اللي غلط.. حتي لو صح..

الأناني عايزك دايما تمشي ورا دماغه ورغباته.. وتسمعي كلامه وغير قابل للمشاركه..

الأناني بيحب السيطرة عليكي وبيحب يشوفك مكسورة دايما تحته.. هو مش سادي بس بيحب يشوف انه مسيطر..

الأناني مش عارف إنه أناني.. هو شايف انه صح.. عايز واحدة تعوضه وتديله كل حاجة في سبيل انه هيبقي معاها بس..

الأناني شخص يبان كويس جدا في العلاقات العامة وممكن يكون اجتماعيا ممتاز والناس كلها بتشهد ليه.. لكن مع شريكته مؤذي نفسيا..

الأناني محب للتلمك بطبعه.. وطول ماهو ضامن وجودك هيهمشك..

الأناني محب لنفسه وشايف بينه وبين نفسه انه كان كتير عليكي أوي..

الأناني مش بيحب يديلك اي حاجة إلا وياخد قصادها حاجة..

الأناني ما بيسألش عليكي من نفسه.. لأنه ما بيسألش إلا لو عايزك انتي تسألي..

الأناني بيدور علي أكتر حاجة توجعك ويعرفها عشان يقدر بعد كدا يضغط عليكي بيها وياخذك لنفسه..

الأناني يبان إنه طيب.. وحد تحبي تكملي معاه في البدايات لأنك هتحسي إنه بيغير عليكي.. لكن هتعرفي في الآخر ان ده تملك مش غيرة..

الأناني بيقضي عليكي عشان تبقي في الآخر نسخه منه.. ونسخه ليه لوحده غير قابله انك تكوني نسخه خاصة لنفسك..

الأناني غير مهتم لتفاصيل عيلته ولا ولاده ولا بيهتم بحد غير رغباته ونفسه بس..

الأناني بيحب الناس اللي برا أكتر من حب عيلته وأولاده.. لحد ما يمتلكهم ويضمن وجودهم..وبعدين يدور على ناس تانية..

الأناني متبلد الإحساس وغير قابل للزعل او الإحساس بالغير.. ف إنتي لو زعلتي يستعجب إنتي زعلانه ليه..

الأناني مش مجرد فرد في مجتمعنا.. الأناني حالة موجودة عند ناس كتيرة فرضتها علينا أفكار تربوية كتيرة وتفضيل الأولاد على بعض وضغوطات حياتية.