راكب قطر درجة ثالثة من غير شباك وحاطط علي وشه فوطة اشتكت من كتر الاستعمال بس مايقدرش يرميها أصلها عهدة مخلته اللي استلامها علشان يستعملها سنة فأستعملها ٦ سنيين ...
والبيادة زانقة علي صوبع رجله الصغير اصل جلدها جف واتشقق واتقوس علي صوابعه ..
قاعد قدامه تاجر فاكهة بجلابية ولاسه نايلون وكرش... بيبتسم ابتسامة ماااسخة زي كوباية الشاي بتاعة قهوة المحطة ...
الهوا والتراب بيخبط وشه بس كان احن كتير من نظرات الناس في عربية القطر اللي معظمهم مقعبز علي الارض ...
ده اللي كان حوالية جوه كان هم تاني انه هيدخل الحارة ويقابله اعلان فيلم هابط متقطع وزي صوت صبي القهوة وهو بيغني ياعيني علي الحلو لما تبهدله الايام ...
مرورا بطلوعه السلم المتهالك ويحط رجله رجل رجل علي درجاته علشان مايخبطتش في ارداف ام سنية وأم هناء وسناء ولمياء اللي السلم مكان مجلس الإدارة اللي بيدار منه أمور النميمة في الحارة .
والاكثر قسوة لما يخبط علي باب ويفتح ابن اخته الصغير اخته اللي اترملت في ٦٧ ويبص له ويفكره بوعده بالثأر اه ثأر ابوه ...
ويقابله ابوه القعيد يسأله بعنيه بس ( لسه ياابني ) فيرد بطئطئة راس ....
قائد كتيبته مش عارف او عارف ان ده السبب ورا مخالفتة الأوامر طول السنين انه مايسالوش ( لسه ياافندم ) فيرد علية لو مابطلتش مافيش نزول الاجازة الجاية ....
٦ سنيين وخالد ( ماهو اخو جمال فلازم يبقي خالد ) مدام مش ابوه ...
الاجازة كانت ٣ ايام بس المرة دي وقف يقول للقائد انهم مايستاهلوش تمن المواصلات ولكن كان البديل انه ماينزلش...
رجع ...فية اية ياولاد الرد جه بحضن من القائد
خلاص ياخالد ...
يااااه هناخد حقنا ياافندم ..قلنا خلاص ياخالد

وكانت ٦ اكتوبر ١٩٧٣...